ہمارے بارے میں

ڈاکٹر کفایت اللہ ہمدانی ایک نامور اسلامی اسکالر، محقق اور ماہر تعلیم ہیں، جو پنجاب یونیورسٹی میں پروفیسر کی حیثیت سے خدمات انجام دے رہے ہیں۔

اسلامی علوم، عربی زبان و ادب، اور بین المذاہب تحقیق میں ان کی گراں قدر علمی کاوشیں نمایاں حیثیت رکھتی ہیں۔ وہ متعدد تحقیقی مضامین اور کتب کے مصنف ہیں، جو علمی و فکری ترقی میں اہم کردار ادا کر رہی ہیں۔

مفتی عبدالرحیم بن ڈاکٹر عطا اللہ ایک جلیل القدر، متواضع عالم، علم کے پیاسے، نادر شخصیت، روشن فکر اور معتدل رویہ کے حامل ہیں۔ وہ ایک علمی و سادات خاندان کے چشم و چراغ ہیں، جن کی علمی پیاس نے انہیں والدہ کی گود سے لے کر دارالعلوم کراچی تک پہنچایا، جہاں انہوں نے حفظِ قرآن کی تکمیل کی۔

ابتدائی تعلیم کے بعد انہوں نے کراچی انٹر بورڈ سے میٹرک اور ایف اے سی کی ڈگریاں حاصل کیں، جبکہ درسِ نظامی کی تکمیل جامعہ بنوریہ عالمیہ سائٹ سے کی۔ علم کی راہیں مزید وسیع کرنے کے لیے انہوں نے عربی، انگریزی، اردو صحافت، تفسیر، علم الفرائض اور فقہ اسلامی جیسے تخصصات میں مہارت حاصل کی۔

مختلف یونیورسٹیوں میں متعدد مضامین پر مبنی کورسز اور ورکشاپس میں شرکت کر کے اپنی علمی کمیونٹی میں نمایاں مقام حاصل کیا۔ وہ کئی مدارس، اسکولوں، کالجوں اور یونیورسٹیوں میں عربی، انگریزی، سیرت اور علم الفرائض جیسے اہم مضامین پڑھانے کا شرف رکھتے ہیں، اور پورے پاکستان میں علم الفرائض کو انگریزی زبان میں پڑھانے میں نمایاں مقام رکھتے ہیں۔

مزید یہ کہ وہ ہزارہ یونیورسٹی میں ایل ایل بی کی تعلیم حاصل کر رہے ہیں، جبکہ انٹرنیشنل اسلامک یونیورسٹی اسلام آباد کے "اسلامک بینکنگ اینڈ فائننس" کے شعبے سے بھی منسلک ہیں، جہاں وہ ایک طویل عرصے سے امام کی حیثیت سے معاشرے کی راہنمائی کر رہے ہیں۔

علاوہ ازیں، انہوں نے 2020 میں "بین الاقوامی اسلامی معہد اسلام آباد" کی بنیاد رکھی اور اس کے صدر مدرس کی حیثیت سے اپنی خدمات پیش کر رہے ہیں۔ مفتی عبدالرحیم کی محنت اور علم کا سفر نہ صرف ان کے خاندان کے لیے بلکہ پورے معاشرے کے لیے ایک روشن مثال ہے۔

صائمہ أمان الله ایک نامور عالمہ، معلمہ اور محققہ ہیں، جو اسلامی علوم اور عربی زبان میں غیرمعمولی بصیرت اور گہری مہارت رکھتی ہیں۔ آپ نے جامعة الحراء للبنين والبنات (وفاق المدارس العربیہ، پاکستان) سے درسِ نظامی کی تکمیل کے بعد جامعة الأنور سے عربی زبان میں تخصص حاصل کیا۔ مزید برآں، آپ نے مرکز الحریم سے تفسیر اور سیرت میں اختصاصی مہارت حاصل کی، جو آپ کی علمی گہرائی اور تحقیقی صلاحیتوں کا واضح ثبوت ہے۔

آپ نے مختلف بین الاقوامی کانفرنسوں میں اپنے علمی و تحقیقی مقالات پیش کیے، جن میں گورنمنٹ کالج یونیورسٹی حیدرآباد، جامعہ پنجاب، اور الکرام انٹرنیشنل انسٹیٹیوٹ، کراچی یونیورسٹی اور اسلامک یونیورسٹی اسلام آباد جیسے موقر ادارے شامل ہیں۔ آپ کی تحقیق کا بنیادی محور سیرتِ نبوی ﷺ اور اس کی عصری معنویت پر مرکوز ہے، جس میں آپ نے ثابت کیا کہ موجودہ دور میں اخلاقی و سماجی اصولوں کی رہنمائی کے لیے سیرتِ طیبہ ﷺ کی روشنی کس قدر ناگزیر ہے۔

آپ کے پانچ تحقیقی مقالات ہائر ایجوکیشن کمیشن (HEC) کے مستند علمی مجلات میں شائع ہوچکے ہیں، اور یونیورسٹی آف میانوالی نے آپ کی تحقیق کو خصوصی اعزاز سے نوازا، جو آپ کی علمی و تحقیقی خدمات کا ایک درخشاں اعتراف ہے۔ ۔

عربی زبان کی تدریس میں آپ کو وسیع تجربہ حاصل ہے، اور آپ عرب دنیا کی مختلف علمی و تدریسی اکیڈمیز میں تدریسی خدمات انجام دے چکی ہیں۔ اس وقت، آپ مرکز الحریم میں عربی زبان کے شعبے کی نگران کے طور پر اپنی خدمات سرانجام دے رہی ہیں، جہاں آپ عربی زبان و ادب کی تدریس کے ساتھ ساتھ اس کے فروغ کے لیے بھرپور علمی و تحقیقی سرگرمیاں انجام دے رہی ہیں۔

اس کے علاوہ، آپ بحریہ یونیورسٹی کراچی سے ایم فل اسلامیات کر رہی ہیں، اور اپنی علمی و تحقیقی کاوشوں کے ذریعے اسلامی علوم اور عربی زبان کے فروغ میں کلیدی کردار ادا کر رہی ہیں۔